By Aerodromci 
Од 22 до 6 часот жителите нема да смеат да фрлаат отпад; градските власти уверуваат дека мерката ќе донесе почисти улици и поефикасно функционирање на службите.
Советот на Град Скопје вчера едногласно ја изгласа новата одлука со која се воведува строга ноќна забрана за изнесување смет. Според документот, граѓаните од 22 часот навечер до 6 часот наутро нема да смеат да оставаат ќеси или други отпадоци покрај контејнерите.
Од Градот појаснуваат дека мерката не е воведена за да се казнува, туку за да се воспостави ред и да се подобри хигиената во метрополата. Во соопштението се наведува дека во изминатиот период е забележано нагласено ноќно истурање смет, што доведувало до преполнување контејнери, разнесен отпад и отежната работа на екипите на „Комунална хигиена“.
„Ноќната забрана ќе овозможи службите да работат по план, без непотребни доцнења и без повторени интервенции на исти локации. Целта е утрата да започнуваат со чисти улици, а градот да изгледа достоинствено,“ велат градските власти.
За оние што ќе ја прекршат новата регулатива, предвидена е казна од 50 евра. Од Градот најавуваат дека инспекциските служби ќе бидат засилени, особено во општините каде што најчесто се пријавуваат неправилности.
Забраната стапува на сила веднаш, а градските служби апелираат граѓаните да ја почитуваат мерката, нагласувајќи дека чист град е обврска што ја делат сите.