By Aerodromci 
Почетокот на македонската борба за слобода и државност
На денешен ден, 23 октомври 1893 година, во Солун, шестмина млади и храбри Македонци – Даме Груев, Христо Татарчев, Петар Поп Арсов, Иван Хаџи Николов, Андон Димитров и Христо Батанџиев – ја создадоа организацијата што подоцна ќе стане симбол на македонската борба за слобода – Внатрешната Македонска Револуционерна Организација (ВМРО).
Во едноставна соба, без големи зборови и без многу сведоци, тие ја положија основата на идејата за слободна и самостојна Македонија. Нивната мисија беше јасна – ослободување на македонскиот народ и создавање своја држава, во време кога таквата мисла се сметала за невозможна.
Од тој ден па натаму, македонската борба доби организирана форма. ВМРО стана патоказ за генерации борци кои подоцна ќе го продолжат патот кон независноста.
Денес, повеќе од еден век подоцна, 23 Октомври не е само спомен на минатото, туку потсетник дека слободата и достоинството мора секојдневно да се бранат.
Во Жена-парк, во Скопје, се наоѓа споменикот на шестмината основачи – место каде што секој што ќе застане, може да ја почувствува тежината и големината на нивното дело.
Од 2007 година, овој ден е државен празник – Ден на Македонската револуционерна борба.
Но за народот, тоа е многу повеќе од празник – тоа е ден на гордост, ден на сеќавање и ден кога Македонија си ја потврдува љубовта кон своите корени.
Вечна слава на основачите на ВМРО.
- Вечна нека е Македонија. 🇲🇰