By Aerodromci 
Во момент кога политичката битка за Скопје станува клучна за престижот и иднината на големите партии, СДСМ направи потег кој сериозно ги збунува и најлојалните поддржувачи на оваа партија. Изборот на Каја Шукова за кандидат за градоначалник на главниот град не само што не носи енергија, туку изгледа како свесно откажување од Скопје.
Каја Шукова е технократ со солидна кариера во администрацијата, но без реална политичка тежина и без препознатлива врска со граѓаните. Таа е речиси непозната за пошироката јавност и никогаш не покажала амбиции или капацитет за водство на комплексна урбана средина каква што е Скопје. Во време кога власта настапува со кандидат како Орце Ѓорѓиевски – искусен, теренски активен и веќе препознатлив лик во јавноста – СДСМ како да влегува во трка без желба да победи.
Политичките аналитичари веќе ја нарекуваат оваа кандидатура „чист подарок“ за ВМРО-ДПМНЕ. Наместо стратешки избор кој ќе го мобилизира урбаниот електорат и ќе понуди силен отпор на опозицискиот бран, СДСМ оди со кандидат кој ќе има проблем да креира дури и пристојна кампања. Со тоа, партијата не само што ризикува тежок пораз во Скопје, туку и испраќа порака за внатрешна дезориентираност и криза на идеи.
Дополнителна загриженост буди тоа што одлучувањето за кандидатурата се одвиваше зад затворени врати, без вклучување на базата, без консултација со скопските ограноци и без реална анализа на пулсот на јавноста. Сето тоа остава впечаток дека изборот на Шукова повеќе е резултат на внатрепартиски калкулации отколку на стратегија за победа.
Во исто време, Орце Ѓорѓиевски веќе се позиционира како фаворит – со настапи на терен, директна комуникација со граѓаните и медиумска видливост. Доколку не се случи некое чудо, вториот круг од изборите – доколку воопшто го има – ќе биде само формалност.
На крајот, ова не е само локален избор. Скопје е симболично и стратегиско срце на државата. Начинот на кој СДСМ ја води оваа битка може да има последици и на национално ниво. Ако ова е најдоброто што можат да го понудат, тогаш прашањето е: дали СДСМ веќе се има откажано од клучните урбани центри? Или уште полошо – дали некој намерно го препушта теренот?