By Aerodromci 
На денешен ден, 4 мај, се навршуваат 122 години од трагичното загинување на еден од најсветлите ликови во македонската историја – Гоце Делчев. Роден на 4 февруари 1872 година во Кукуш, тогаш под османлиска власт, Гоце уште од младоста ја почувствувал неправдата врз македонскиот народ и ја избрал патеката на борбата за слобода и самостојност.
Гоце Делчев не бил обичен револуционер. Тој бил визионер, организатор, просветител и идеолог. Се школувал во Солун, а подоцна и на Воената академија во Софија, но ја напуштил војничката кариера за да се стави во служба на народот. Верувал дека слободата не се добива како подарок, туку се освојува со ум, срце и со подготвеност на жртва.
Како еден од главните водачи на Тајната македонско-одринска револуционерна организација (ТМОРО), Делчев одиграл клучна улога во организирањето на востанието против османлиската власт. Но неговата визија не била само во оружената борба – Гоце активно работел на ширење на свеста, образование и националната идеја меѓу населението.
Неговата мисла „Јас го разбирам светот како поле за културен натпревар меѓу народите“ и денес инспирира. Таа сведочи за неговата напредна, демократска и хуманистичка мисла, далеку пред своето време.
На 4 мај 1903 година, Гоце Делчев загина во заседа кај селото Баница, во обид да ја зајакне организацијата пред Илинденското востание. Загина млад, но неговото дело остана живо и трајно вградено во темелите на македонската државност и идентитет.
Делчев не припаѓа само на минатото. Тој е вечен симбол на слободољубието, правдата и достоинството. Денес, со почит и благодарност, го чествуваме неговото дело.
Слава му