By Aerodromci 
Општина Кисела Вода продолжува со активно планирање и иницирање на капитални проекти, насочени кон унапредување на квалитетот на живот на нејзините жители. На последниот јавен повик за капитални инвестиции објавен од Владата на Република Македонија, општината поднесе дури 22 проекти, со што уште еднаш покажа проактивен пристап и визија за развој.
Меѓу новите шест проекти кои се доставени до Владата се наоѓаат изградбата на нова поликлиника на градежна парцела ГП 06.01, изградба на фекална канализација во населеното место Бабин Дол, реконструкција на објектите на месните заедници во Пинтија и Драчево, доградба на спортска сала во ООУ „Кузман Шапкарев“, како и поставување јавно улично осветлување на патот кон манастирот Пеленица.
Овие проекти доаѓаат како надополнување на претходно поднесените 16 предлози, меѓу кои се реконструкции на клучни улици и краци, уредување на пешачки зони и каналски системи, санација на мостови и патишта, доградба на училишта и изградба на нови паркинг-простори.
Градоначалникот на Кисела Вода, во своето обраќање до јавноста, изрази благодарност до Владата и премиерот Христијан Мицкоски за отвореноста кон соработка и поддршката на вакви значајни иницијативи. Тој нагласи дека ваквите партнерства се клучни за постигнување рамномерен развој и обезбедување еднакви можности за сите граѓани, без разлика во кој дел од општината живеат.
Проектите се очекува да придонесат не само за подобрување на инфраструктурата, туку и за поттикнување на локалната економија, подобрување на условите во образованието, здравството и комуналните услуги, како и за создавање поквалитетно и побезбедно секојдневие за сите жители.