By Aerodromci 
По првпат, во Црна Гора е воведен Правилник за контрола на имот и животен стил на вработените во Министерството за внатрешни работи. Оваа мерка, која веќе предизвикува позитивни реакции во јавноста, претставува исклучително важен чекор кон враќањето на довербата во полицијата и борбата против корупцијата.
„Не е важно само што стои во службената белешка. Важно е и што се гледа во нечие однесување. Како живее, што вози, и што не може да објасни“, порачаа од црногорското МВР, нагласувајќи дека значката треба да биде симбол на одговорност, а не на статус.
Ова е пример кој заслужува внимание и надвор од границите на Црна Гора. Македонија, како земја што се соочува со слични предизвици во системот на безбедност и владеење на правото, мора сериозно да размисли за воведување на сличен модел.
Ваквите механизми не се алатка за прогон, туку начин да се зајакне интегритетот на институциите и да се заштитат оние полициски службеници кои чесно ја вршат својата работа. Во исто време, тие се предупредување за сите оние кои ја користат службената функција за лична корист.
Министерството за внатрешни работи на Македонија има историска шанса да покаже дека е подготвено за вистинска реформа – реформа што ќе ја зајакне довербата кај граѓаните и ќе ја врати честа на полициската професија.