By Aerodromci 
Ангел Димитров, копретседавач од бугарска страна во Заедничката историско-образовна комисија со Северна Македонија, повторно го привлече вниманието со своите ставови за идентитетските прашања. Во интервју за Бугарското национално радио (БНР), тој изјави дека „дебугаризација“ во Македонија не е можно сценарио, бидејќи, како што рече, „постојат гени на сеќавањето“.
„Стравот од самото спомнување на Бугарија, премиерот го нарекува ‘источен осет’. Тоа е повеќе отколку политичка реторика – тоа е тип на однесување. Тој страв е самообјаснувачки и покажува колку е длабок проблемот“, изјави Димитров.
Според него, неопходна е катарза – прво во науката, а потоа и во политиката. Вели дека Северна Македонија се наоѓа пред сериозна историска раскрсница: дали ќе продолжи со конфронтирачката традиција од минатото, која ја прави нестабилен дел од Источна Европа, или ќе се ослободи од, како што вели, „историскиот товар што ја држи врзана за пропаднатото минато“.
Овие ставови Димитров ги изнесе по повод промоцијата на неговата нова книга „Бугарија и Република Северна Македонија – Средба меѓу историјата и политиката“, каде уште еднаш ги реафирмира своите позиции за иднината на билатералните односи меѓу двете земји.