By Aerodromci 
Американскиот претседател Доналд Трамп објави нови трговски мерки, вклучувајќи значително зголемување на царините за увоз од повеќе земји, меѓу кои и Македонија. Според информациите објавени од Ројтерс, царината за македонските производи ќе изнесува 33 отсто.
Со оваа одлука, Македонија се најде меѓу земјите што се значително погодени од новите мерки, но сепак не е во групата со највисоки царини, кои достигнаа и до 50 отсто.
Покрај Македонија, новите царини ги погодија и други држави. Израел ќе се соочи со 17 отсто царини, Тајван со 32 отсто, додека за Украина ќе важи 10 отсто. Во регионот, најголем удар добија Босна и Херцеговина со 35 отсто и Србија со 37 отсто. Интересно е што Албанија, Црна Гора и Косово не се споменати во листата со нови давачки.
Овие мерки се дел од пошироката стратегија на администрацијата на Трамп за заштита на домашната економија и намалување на трговскиот дефицит. Сепак, останува да се види какви ќе бидат реакциите од погодените земји и дали ќе следуваат контрамерки.