By Aerodromci 
Полицаец од Охрид заработи кривична пријава поради сомнение дека бил инволвиран во неовластено производство и дистрибуција на наркотични дроги, психотропни супстанции и прекурзори, соопшти Министерството за внатрешни работи.
Според информациите, станува збор за полицискиот службеник А.М., кој во моментот на контролата бил на работна должност, обезбедувајќи ја вилата „Бела“ (поранешна вила Македонија), сопственост на МВР. При извршената проверка од страна на Одделот за внатрешна контрола, криминалистички истраги и професионални стандарди, во стражарската куќарка каде што бил сместен А.М. биле пронајдени предмети со сомнителна содржина.
Меѓу доказите, како што информираат од Министерството, биле пронајдени метална лажица со бела прашкаста материја, хартиена салфетка со слична супстанца, како и мало пластично шише со непозната течност, затворено со алуминиумска фолија и импровизирана цевка од банкнота од 10 денари. Овие предмети биле испратени на понатамошно вештачење.
По откритието, на полицаецот му било побарано да се подложи на тестирање за присуство на наркотични материи во Институтот за судска медицина во Скопје. Според екипата на Итната медицинска помош во Охрид, која го прегледала, А.М. бил во добра општа здравствена состојба и можел да патува до Скопје. Сепак, тој одбил да соработува со надлежните органи и да се подложи на испитување.
Случајот е предаден на надлежните институции за понатамошна постапка.