By Aerodromci 
Документарниот филм „Кочани – прекинатата младост“, емитуван на Хрватската радио-телевизија, ја раскажа трагичната приказна што остави длабока рана не само во Кочани, туку и низ целиот регион. Преку потресни сведоштва и лични исповеди, емисијата ја отслика болката, разочарувањето и гневот на граѓаните, кои соочени со суровата реалност, се обидуваат да најдат одговори.
Соговорниците отворено зборуваат за причините и одговорноста за трагедијата, при што главниот фокус е ставен на системските пропусти и долгогодишната негрижа од страна на властите. Мнозинството учесници во документарецот упатуваат жестоки критики кон институциите, обвинувајќи ги за нефункционалност и корупција, кои, според нив, довеле до оваа несреќа. Но, истовремено, многумина признаваат дека одговорноста не е само кај носителите на моќта, туку и кај сите што премолчено дозволиле ваквите состојби да продолжат.
Документарецот завршува со емоционален момент – звуците на една од најтажните македонски народни песни, кои го доловуваат чувството на загуба и тага што засекогаш ќе остане во срцата на оние што ги изгубија своите најблиски.