Мицкоски најави реформи: Нема веќе плата без работа во администрацијата

Денеска ја одржавме втората седница на Советот за реформа на јавната администрација, прва во овој состав, откако ја донесовме новата Стратегија за реформа. Јавната администрација не е само механизам за спроведување на закони и политики, туку е лицето на државата и одраз на нејзината ефикасност.

За жал, сведочевме на слабости, партизираност и недоволна компетентност во изминатите години, но тоа мора да се промени. Нема веќе седење дома и земање плата. Се бориме за професионална администрација каде што вработувањата и унапредувањата ќе бидат засновани на знаење, вештини и резултати, а не на партиски влијанија. Ќе воведеме транспарентни критериуми за селекција и континуирана евалуација, со што ќе обезбедиме само најдобрите да бидат дел од институциите.

Администрацијата мора да биде дигитализирана, ефикасна и фокусирана на услугите за граѓаните. Ќе инвестираме во нови дигитални алатки, ќе ја унапредиме етичката одговорност и ќе обезбедиме постојани обуки за усовршување на службениците. Професионалец не е само оној што знае, туку и оној што работи одговорно и транспарентно. Квалитетната администрација значи мотивирани и задоволни службеници со фер плати и можности за напредок врз основа на заслуги. Време е администрацијата да стане вистински сервис за граѓаните и двигател на развојот!