By Aerodromci 
Додека светот внимателно следи дали ќе се отвори простор за мировни преговори за војната во Украина, Русија испраќа јасна порака – нема отстапки кога станува збор за Запорожската нуклеарна централа , најголемата во Европа.
„Централата нема да биде предадена – ниту на Украина, ниту на меѓународните институции, ниту на Соединетите Држави. Наше е, крај на приказната“, пренесуваат руските власти, цитирани од Политико.
Оваа изјава доаѓа по наводите дека американскиот претседател Доналд Трамп ја разгледува ЗНПП како клучен дел од евентуален договор за експлоатација на украинските природни ресурси. Според овие информации, Вашингтон наводно има интерес за реконструкција на електроенергетската инфраструктура на Украина, со што би се обезбедила поголема енергетска независност на земјата.
Но, од Кремљ со остар тон ги отфрлија ваквите планови.
„Запорожската нуклеарна централа е интегрирана во рускиот енергетски систем и тоа е реалност што меѓународната заедница може само да ја прифати“, соопшти руското Министерство за надворешни работи.
Централата, лоцирана во градот Енерходар, е под руска контрола од 2022 година. Пред почетокот на војната, таа обезбедуваше околу 20% од електричната енергија на Украина, но во моментов не е во функција повеќе од две години. Нејзиното повторно активирање би барало значајни технички, безбедносни и политички напори.
Додека судбината на ЗНПП останува клучно прашање во геополитичката арена, јасно е дека Москва нема намера да отстапи од нејзината контрола.