Зголемување на платите во образованието од април – Јаневска ги демантира шпекулациите

Почнувајќи од април, сите вработени во основните и средните училишта ќе добијат зголемување на платите за седум проценти, потврди министерката за образование и наука Весна Јаневска.

Таа нагласи дека, и покрај шпекулациите кои се појавија на социјалните мрежи, нема никакви пречки во процесот на покачување. „Одговорно тврдам дека наставниците ќе си ја добијат зголемената априлска плата, како што беше случај и претходните години“, изјави Јаневска, одговарајќи на новинарско прашање пред почетокот на третиот Женски Економски Форум во Скопје.

Најавеното зголемување се однесува не само на наставниот кадар, туку и на сите останати вработени во основното и средното образование, што, според министерката, е дел од континуираните заложби за подобрување на условите во образовниот сектор.