САД ЈА ПОТВРДУВА ПОДДРШКАТА ЗА ЦАРИНСКАТА УПРАВА: ВОСПОСТАВЕНА ПОТЕСНА СОРАБОТКА ЗА БЕЗБЕДНОСТ И ПРИХОДИ

Во изминатите осум месеци, Царинската управа на Македонија оствари значајни резултати во прибирањето на приходи, борбата против криминалот и заштитата на граѓаните. Овие успеси беа во фокусот на денешната средба меѓу царинските претставници и висока делегација од Соединетите Американски Држави, предводена од амбасадорката Ангела Агелер.

Силна американска поддршка за македонската Царина

Амбасадорката Агелер ја нагласи важноста на напорите што ги прави Царинската управа, истакнувајќи дека САД остануваат посветени партнери на Македонија во областа на безбедноста и економскиот развој.

„Моето присуство овде е да ви се заблагодарам и да ви честитам за резултатите во изминатите осум месеци, кои се навистина воодушевувачки. Благодарност до царинските службеници кои работат на границите и ги штитат граѓаните. Чекорите што ги преземате се многу значајни за нас, но уште повеќе за вашите граѓани и безбедноста на државата. Истовремено, поголемата наплата на приходи значи повеќе средства за вашите граѓани. Ние сме ваши партнери, пријатели и ќе бидеме тука за вас“, изјави амбасадорката Агелер.

Заедно со амбасадорката, во посетата учествуваа и директорката на Канцеларијата за меѓународна борба против наркотици и спроведување на законите Вирџинија Елиот, како и заменик шефот на Канцеларијата за билатерална воена соработка, Даниел Силвер.

Заедничка визија за побезбедна и поефикасна Царина

На средбата со директорот на Царинската управа, Бобан Николовски, и неговиот тим, беше потенцирана важноста на соработката меѓу двете земји во делот на јакнење на капацитетите на царинските служби.

Николовски изрази благодарност за континуираната поддршка од Владата на САД и подвлече дека продлабочувањето на оваа соработка е од клучно значење за остварување на заедничките стратешки приоритети.

„Поддршката од нашите стратешки партнери, како САД, е од непроценливо значење за модернизацијата на Царинската управа. Ние остануваме посветени на реформите кои ќе ја зголемат ефикасноста, транспарентноста и безбедноста во царинското работење“, нагласи Николовски.

Со денешната посета се потврди дека Соединетите Американски Држави ќе продолжат да ја поддржуваат Македонија во развивањето на силни и функционални институции, кои не само што ќе ја зајакнат економијата, туку и ќе придонесат за подобра безбедност на граѓаните.